ရေးသားသူ - ဖဲဘီး
နေ့စွဲ - မတ်လ (၁)ရက်. ၂၀၁၁
နေ့စွဲ - မတ်လ (၁)ရက်. ၂၀၁၁
အိမ်ခြေပေါင်း (၈၀) ၀န်းကျင်ခန့်ရှိတဲ့ ကုလားလန်ရွာကလေးဟာ ရှမ်း-ကရင်နီနယ်စပ်မှာပါ။ ရွာရဲ့နဘေးမှာ ပွန်ချောင်းလို့ခေါ်တဲ့ အပြာရောင် ရေချောင်းကြီးက တသွင်သွင် စီးဆင်းနေပါတယ်။ ကုလားလန်ရွာထဲကို ပအိုင်း၊ ရှမ်း၊ ကရင်နီလက်နက်ကိုင် အဖွဲ့အစည်းများ ၀င်ထွက်သွားလာတဲ့အပြင် ရွာအနီးရှိ မြန်မာစစ်အစိုးရ တပ်တို့လည်း မကြာခဏ ၀င်ထွက်သွားလာ နေကြပါတယ်။
ယခုလ ၉ ရက်နေ့မှ ၁၃ ရက်နေ့အထိ ကုလားလန်ရွာသား ၁၁ ဦးကို စစ်အစိုရတပ်ရင်း ခလရ ၄၂၃နဲ့ ၄၂၄ တို့က တပ်လုပ်အားပေးအဖြစ် ဆင့်ခေါ်ပြီး တပ်စခန်းမွန်းမံရန်အတွက် အလုပ်ကြမ်းများဖြင့် အတင်းအဓမ္မ စေခိုင်းတယ်လို့ ဆိုပါတယ်။ အလုပ်ချိန်ကို မနက် ၆ နာရီမှ ညနေ ၆ နာရီအထိမနားတမ်း လုပ်ဆောင်ပေးရပါတယ်။
အဲဒီလို အတင်းအဓမ္မ လုပ်အားပေးစေခိုင်းမှုဟာ ကုလားလန်ရွာအနေနဲ့ အခုတခေါက်ထဲ မဟုတ်ပါဘူး။ မကြာခဏဆိုသလို၊ ခေါ်ခိုင်းရင်ခေါ်ခိုင်းတဲ့အချိန်တိုင်း လုပ်ဆောင်ပေးနေရတယ်လို့ ကလားလန်ရွာသူကြီးဖြစ်ခဲ့ဖူးသူ တစ်ဦးက ပြောပါတယ်။
"ညကိုးနာရီကတည်းက ပွန်ချောင်းကို ဆင်းရတယ်လေ၊ ညကတည်းက အရင်ဆင်းထားမှ ရှေ့မှာရှိတဲ့တစ်ဖွဲ့ကို မနက်(၆)နာရီ သူတို့ပြန်လွတ်မယ်လေ၊ အဲဒါမှ သူတို့ပြန်ရတယ်ပေါ့" လို့ ကုလားလန်ရွာသူကြီး အလှည့်ကျဖြစ်ခဲ့ဖူးသူက ပြောပါတယ်။
လုပ်အားပေးစေခိုင်းမှုအပြင် တခြားသော တပ်နဲ့ပတ်သက်တဲ့ သတင်းပို့ဆောင်ပေးခြင်းကိစ္စကိုလည်း ရွာသားတွေကမကြာခဏ မပျက်မကွက် လုပ်ဆောင်ပေးနေကြရတယ်လို့ ဆိုပါတယ်။
ကလားလန်ရွာမှ ရွာသားတို့ဟာ ရွာမှ တစ်နာရီခွဲလောက် လမ်းလျှောက်သွားရတဲ့ ၄၂၃ နဲ့ ၄၂၄ တပ်စခန်းနဲ့ ရွာရဲ့မြောက်ဘက် ၁၀ မိနစ်ခန့်ရှိတဲ့ ၄၂၆ တပ်စခန်းကိုဆီတို့ကို နေ့စဉ်နဲ့အမျှ သတင်းထူးသည်ဖြစ်စေ မထူးသည်ဖြစ်စေ သွားရောက်ပို့ပေးနေရပါတယ်။
"သတင်းသွားပို့တာက ဘာမှမဟုတ်ပါဘူး၊ သတင်းမထူးဘူးလို့ ဥက္ကဌလက်မှတ်ထိုးပြီး စာသွားပို့ရုံပါဘဲ၊ ဒါပေမဲ့သူတို့တော့ တစ်ခါတစ်လေမေးတာ၊ စစ်တာပေါ့၊ ဟိုတောက အကောင်တွေ တွေ့လား အဲလိုပေါ့" လို့ နေ့စဉ် သတင်းသွားရောက်ပို့ပေးဖူးတဲ့ ရွာသားတစ်ဦးက ပြောပါတယ်။
ယခုလအစောပိုင်းက သတင်းပို့ရန်အလှည့်ကျတဲ့ ကုလားလန်ရွာသားတစ်ယောက်က ဇနီးနေမကောင်းဖြစ်နေတဲ့အတွက် သတင်းသွာရောက်မပို့နိုင်တဲ့အတွက် တောင်းပန်စာရေးပြီး တစ်ခြားသူငယ်ချင်း တစ်ယောက်နဲ့ သွားခိုင်းခဲ့ရပါတယ်။
"သတင်းသွားပို့ပေးပြီးမှ အကယ်၍ သွားပို့တဲ့အချိန်မှာလည်း လုပ်အားပေးလည်း လုပ်ပေးနေရတယ် ရွာမှာရှိတဲ့ ရွာစောင့်တွေကလည်း အနောက်ဘက်မှာလဲ သတင်းသွားပို့ပေးရတယ်. တစ်ခါတစ်လေ ဆိုင်ကယ်တွေလာပြီးတော့ ချောဆွဲတာလဲရှိတယ်၊ တစ်ခါတစ်လေ ဟင်းတွေ ရှာခိုင်းတယ် ရွာစောင့်သမားတွေကလည်း ရှေ့မှာသတင်းသွားပို့ရတယ်” လို့ သတင်းသွားရောက်ပို့ပေးရတဲ့အခြေအနေကို ကုလားလန်ရွာခံက ရှင်းပြသွားပါတယ်။
သတင်းသွားရောက်ပို့ပေးတဲ့အခါမှာလည်း စစ်တပ်တို့ရဲ့ ဆူပူကြိမ်းမောင်းခြင်းကိုခံရတဲ့အတွက် ရွာသားများအနေဖြင့် မည်သူမျှမသွားချင်ဘဲ ရှိနေခဲ့ပါတယ်။ ရွာသူကြီးမှ ထိုကိစ္စအပေါ် အစည်းအဝေးခေါ်ယူပြီး သတင်းပို့ဆောင်ရမည့်ကိစ္စကို နည်းလမ်းရှာဖွေပြီး ဆုံးဖြတ်ခဲ့ရတယ်။ အစီးအဝေးရဲ့ဆုံးဖြတ်ချက်အရ ကုလားလန်ရွာမှာ တရက်ကို အလှည့်ကျရွာစောင့်နှစ်ဦးကို ရွေးချယ်ကြရပါတယ်။ တရက်ကို အလှည့်ကျရွာစောင့်နှစ်ဦးဟာ ရွာသူကြီးအဖြစ်လည်း တာဝန်ထမ်းဆောင်ရသလို သတင်းပို့ဆောင်ရေးလုပ်ငန်းတို့ကိုလည်း တာဝန်ယူဆောင်ရွက်ကြရပါတော့တယ်။
အလှည့်ကျသတင်းပို့ အလှည့်ကျလုပ်အားသွားလုပ်ပေးရတဲ့ကိစ္စမှာ အမျိုးသားယောင်္ကျားများမရှိတဲ့ အိမ်ထောင်စုတို့အနေနဲ့ ပိုက်ဆံ ၁၂၀၀၀ ကျပ် အကုန်ခံပြီး လူငှားရပါတယ်။ ဒါပေမဲ့ စစ်တပ်ကို ကြောက်နေရတဲ့ရွာသားတို့မှာ အဲ့ဒီငွေ ၁၂၀၀၀ ကိုလည်း မမက်မောကြပါဘူး။ နောက်ဆုံးတော့ လင်ယောင်္ကျားမရှိတဲ့ မိသားစုတို့မှာ မျက်ရည်မျက်ခွက်နဲ့ ငွေပေးပြီး သတင်းပို့ပေးမယ့်သူကို ငှားကြရပါတယ်။
ကုလားလန်ရွာမှာ ပြည်သူလူထုတွေပိုင်ဆိုင်ကြတဲ့ ရုပ်မြင်သံကြား အပေါ်စက်နဲ့အောက်စက်တွေကို စစ်တပ်တို့က ကြိုက်သလို ယူသုံးကြပါတယ်။ ပိုင်ရှင်တို့ကပြန်တောင်းရင် ရိုက်ခွဲပစ်တယ်လို့ ဆိုပါတယ်။ အလားတူ တပ်စခန်းကနေရွာထဲသို့ သွားလာရေးလွယ်ကူစေရေးအတွက် ဆိုင်ကယ်ရှိတဲ့သူတို့အနေနဲ့ တစ်ရက်တစ်စီး စီမံပေးရတယ်လို့ ဆိုပါတယ်။
“ဆိုင်ကယ်ကို တစ်နေ့ကို တစ်စီးထိုးပေးရတယ်။ တစ်စီး၊ နှစ်စီး၊ တစ်စီး၊ နှစ်စီးထိုးပေးရတာနဲ့ ကျနော်တို့ရွာလည်း အဲလိုဘဲလေ။ ဒါဏ်မခံနိုင်တာနဲ့ အဲဒါ ကျနော်တို့ နောင်ထောင်ဒေသမှာရှိတဲ့ ဆိုင်ကယ်သမားတွေစုတယ်။ ဆိုင်ကယ်ရှိတဲ့သူ တယောက် ၅၀၀၀ ထောင်စုပြီးတော့ အဲဒါ ၃၀၀၀၀၀ သိန်းကျော်ကျော်လောက် ရတယ်ထင်တယ်။ အဲဒါ ဆိုင်ကယ်တစ်စီးတောင် ၀ယ်ပေးတယ်။ သူတို့ဆိုင်ကယ်ချောဆွဲတဲ့ ဒဏ်ကိုမခံနိုင်တဲ့အတွက် အဲဒါ ဆိုင်ကယ်ပါ ၀ယ်ပေးလိုက်ရသေးတယ်” လို့ ကုလားလန်ရွာသားတစ်ဦးက ပြောပါတယ်။
ပြီးခဲ့တဲ့ ၂၀၁၀ ခုနှစ် ဇွန်လတုန်းက တော်လှန်ရေး လက်နက်ကိုင်တပ်ဖွဲ့ ထောင်ထားတဲ့မိုင်းကို ထော်လဂျီတစ်စီး စီးလာတဲ့ စစ်တပ်တစ်စုအား ထိမံသွားကာ အခင်းဖြစ်ပွားမှုကို မကျေမနပ်ဖြစ်သော စစ်သားများက ကုလားလန်ရွာအပါအ၀င် အနီးအနားရှိ နောင်ထောင်ဒိုကုံး၊ နောင်ထောင်ရွာသစ်၊ ပန်ကျနဲ့ ဗန့်မက်ရွာမှရွာမိရွာဖတို့အား တပ်ထဲသို့ ဖမ်းဆီးခေါ်ဆောင်သွားပြီး ငါးရက်တိတိ နှိပ်စက်ညှင်းဆဲခဲ့ပါတယ်။
“ကျနော်တို့ ကုလားလန်က ရွာဥက္ကဌကို ဖမ်းသွားတယ်။ ဖမ်းသွားတဲ့အချိန်မှာ ကျနော်တော့ မမြင်လိုက်ရဘူး။ အမေတို့တော့ မြင်တယ်။ စစ်သားငါးယောက်က ဖမ်းသွားတယ်။ ဖမ်းသွားပြီးနောက်ပိုင်းမှာ သူ့အိမ်က စာရွက်စာတမ်းတွေ မွေသေးတယ်။ သူနဲ့ဆိုင်တဲ့ စာရွက်စာတမ်းတွေ အကုန်သိမ်းဆီးသွားတယ်။ အဲ့ဒါပြီးတော့ လေးငါးယောက်လောက် ဖမ်းသွားတယ်….. ဖမ်းပြီးတော့ စခန်းမှာ အခုကျနော်တို့ရွာရဲ့ မြောက်ဖက်ခြမ်းက စခန်းလေ အဲမှာသွားနှိပ်စက်တယ်။ အဲဒါ ကြားနေရတယ်။ အဲအချိန်မှာ အမေကယ်ပါနဲ့… အော်နေတာ။ ထိုးလိုက်ကြိတ်လိုက်နဲ့” လို့ ကလားလန်ရွာခံက ရှင်းပြပါတယ်။
ဖမ်းဆီးခေါ်ဆောင်သွားတဲ့ ရွာမိရွာဖတို့မှာ ယနေ့ထိရွာထဲသို့ ပြန်မရောက်ဘဲ ပျောက်ဆုံးနေကြတယ်လို့ အဖြစ်မှန်ကို သိရှိထားတဲ့ရွာခံက ယခုလိုဆက်ပြောပြပါတယ်။
“သူတို့စခန်းမှာချုပ်နေတုန်း ကျနော်တို့ ၀င်လို့မရဘူး။ သူတို့ဖမ်းသွားတာ ဘယ်ရောက်ဘယ်ပျောက်နေလည်း မသိဘူး။ သတင်းလိုက်ရှာသေးတယ်။ ဆီဆိုင်မှာ ကျနော်တို့သွားတယ်။ ဘာမှမသိရဘူး။ ကျနော်တို့ရွာကဥက္ကဌလည်း ဒီလိုဘဲ စုံစမ်းနေတယ်။ ဒါပေမဲ့သတင်းအစအန မရတော့ဘူး။”
ရွာသူရွာသားတွေကို စစ်တပ်တွေက အမြဲလိုလို အနိုင်ကျင့်ဆက်ဆံနေတဲ့အတွက် ကုလားလန်ရွာရဲ့ အခြေအနေကို ရွာခံတစ်ဦးက ယခုလိုခြုံပြီး ပြောပြခဲ့ပါတယ်။
“နောက်မှာလည်း သူတို့(စစ်တပ်)ခိုင်းတဲ့ အတိုင်းလည်း လုပ်ပေးနေရတယ်။ အဲလိုမျိုးပေါ့။ ကုလားလန်ရွာမှာဆိုရင် အခက်အခဲဆိုတာ နေ့တိုင်း ပုံမှန်ရှိနေတဲ့ပုံစံသဘော။ အဲဒီလိုမျိုးဖြစ်နေတယ်ပေါ့"
No comments:
Post a Comment